O sol e a calor serán protagonistas nas Rías Baixas a partir deste martes
Por Redacción
A borrasca situada ao norte de Azores durante este luns deixará ceos parcialmente cubertos. A tarde será de alternancia de nubes e claros. As temperaturas mínimas ascenderán moderadamente mentres que as máximas non experimentarán cambios significativos situándose entre os 16 e os 22 graos. O vento soprará frouxo de compoñente sur, con intervalos moderados na franxa atlántica.
O martes, Galicia irá quedando progresivamente en influencia anticiclónica, segundo as previsións do servizo de Meteogalicia. Rexistrarase unha entrada de aire cálido desde o sur peninsular. Durante as primeiras horas da mañá, os ceos estarán parcialmente cubertos e ao longo do día irán desaparecendo as nubes. As temperaturas sufrirán un lixeiro descenso mentres que as máximas ascenderán situándose entre os 14 e os 23 graos, con vento frouxo de compoñente norte.
As altas presións e a entrada de aire cálido procedente do sur caracterizarán o tempo durante o mércores 8. Os ceos permanecerán pouco nubrados ou despexados, con nubes de estancamento no extremo norte nas primeiras e nas últimas horas do día. As temperaturas tenderán a ascender, tanto as máximas como as mínimas e notarase unha sensación de calor durante a tarde. Os ventos soprarán frouxos de dirección variable.
A partir do xoves, as Rías Baixas continuarán baixo a influencia das altas presións e o aire cálido. Espérase un día de sol e calor en toda Galicia. O anticiclón debilitarase lixeiramente durante o venres 10 e iniciarase un período de inestabilidade cun aumento de nubes, que se manterán durante o sábado. As altas presións retornarán durante o domingo. As temperaturas oscilarán entre os 14 e os 27 graos.