Máis dun cento de inscritos na xornada sobre economía circular promovida por Sogama en Pontevedra
Por Redacción
Este venres 3 de xuño, Sogama celebrará na cidade de Pontevedra, concretamente na sede de Afundación, unha xornada coa que pretende afondar no concepto de economía circular e as súas implicacións para o desenvolvemento sostible da nosa comunidade a través da correcta xestión dos residuos urbanos.
Na mesma xa se inscribiron máis dun cento de persoas, na súa maioría técnicos de concellos da provincia, estudantes universitarios, membros do sector e particulares con inquietudes nas temáticas a tratar.
Baixo o título "Sogama, na senda da economía circular", o evento, co que Sogama conmemora o Día Mundial do Medio Ambiente, que terá lugar o vindeiro domingo 5 de xuño, será inaugurado ás 10:00 horas pola conselleira de Medio Ambiente e Ordenación do Territorio, Beatriz Mato.
Pola súa banda, o presidente da empresa pública, Javier Domínguez, encargarase de presentar e moderar a xornada, na que participarán expertos de alto nivel, os cales darán a coñecer a situación actual e perspectivas de futuro para a xestión dos residuos urbanos en Europa, España e Galicia.
INTERVENCIÓNS
Con tal fin, contarase coa intervención, na sesión matutina, do director da Fundación Finnova (Bruxelas), Juan Manuel Revuelta, que disertará sobre os instrumentos de finanzamento comunitario na xestión sostible dos residuos urbanos; a subdirectora xeral de Residuos do Ministerio de Agricultura, Alimentación e Medio Ambiente (MAGRAMA), quen dará a coñecer os aspectos máis destacables do Plan Estatal Marco de Xestión de Residuos (PEMAR) 2016-2020; a subdirectora xeral de Residuos da Xunta de Galicia, Verónica Tellado, que falará sobre o presente e futuro da xestión dos residuos urbanos en Galicia, tomando como referencia o Plan autonómico 2010-2020; e o presidente de Aeversu (Asociación Española de Empresas de Valorización Enerxética de Residuos Urbanos), que se centrará en explicar a situación actual deste sistema e os seus beneficios ambientais, económicos e sociais.
Xa pola tarde, o responsable da Área Técnica de GHK (Consorcio de Residuos de Guipúzkoa), dará a coñecer a experiencia desta provincia na compostaxe, mentres que o director xeral de Sogama, Isidro García Téllez, exporá o proceso de ampliación da infraestrutura industrial da entidade e obxectivos.
A secuencia de relatorios pecharase por parte do xerente de Proxectos de Residuos en Applus+, Benito Blanco, quen se deterá en perfilar os retos da xestión dos residuos municipais nun marco de economía circular.
No transcurso da xornada reservaranse espazos para o coloquio, posibilitando que os asistentes que así o desexen poidan efectuar as súas preguntas e trasladen as súas observacións e comentarios.
O acto de clausura virá da man de Javier Domínguez, que dará conta das conclusións da xornada, procedendo á entrega de diplomas.