Representantes de múltiples colectivos, pendentes do novo sistema de reciclaxe
Por Redacción
Máis dun cento de representantes de asociacións veciñais tanto da contorna urbana como rural, de comunidades de montes e doutros colectivos participaron na reunión convocada polo Concello no Sexto Edificio do Museo, onde se realizou unha presentación pública do proxecto do novo sistema de tratamento e recollida de lixos de Pontevedra.
Miguel Anxo Fernández Lores, alcalde de Pontevedra, foi o primeiro en intervir para explicar que esta proposta alternativa a Sogama era unha aposta desde que chegou á alcaldía e que se verá executada ao longo deste mandato.
De feito, durante esta reunión o goberno municipal avanzou que, o próximo mes, comezarán a funcionar os composteiros comunitarios de Monte Porreiro e Campañó. O resto de barrios e parroquias do rural iranse incorporando a este sistema de recollida de orgánicos de forma paulatina ata 2017. Ademais, o próximo curso comezarase a traballar neste sentido tamén desde os colexios do municipio.
Pola súa banda, Carme da Silva, concelleira de Medio Ambiente, o vicepresidente da Deputación, César Mosquera, o coordinador de Participación Cidadá, Alberto Oubiña e o experto asesor de compostaxe, Carlos Pérez, tamén interviñeron para explicar os detalles deste proceso.
Os participantes incidiron na importancia que terá a implicación veciñal para que este sistema convértase nun éxito. Neste sentido, explicaron na necesidade de acometer unha boa separación dos residuos e na participación dos cidadáns.
"A idea é que as asociacións de veciños teñen un papel central. É un reto colectivo e creo que imos ser capaces de facelo", sinalou o alcalde.
A partir de maio está previsto que leven a cabo sesións informativas nos barrios e nas parroquias nas que se expoñerá o proxecto, os procedementos e os tempos que se seguirán co obxectivo de que o sistema se implante no prazo dun ano.
Actualmente recíclanse ao redor dun 8% dos residuos en Pontevedra, segundo explicaron. O obxectivo que se propón o goberno local é superar o 70%.
Relacionadas:
-
Arranca a segunda fase do Plan Compost
Por Redacción |
-
Máis dun cento de inscritos na xornada sobre economía circular promovida por Sogama en Pontevedra
Por Redacción |
-
Os barrios de Campolongo e Monte Porreiro empezarán coa compostaxe comunitaria á volta do verán
Por Oskar Viéitez |
-
Freo á modificación de crédito anunciada polo goberno municipal
Por Redacción |
-
O goberno local presentará o seu plan de compostaxe nun acto no Museo o vindeiro 14 de abril
Por Redacción |
-
Están dispostos os pontevedreses a sumarse ao novo sistema de reciclaxe?