Como "previr en gran medida" a morte súbita no deporte
Por Redacción
Máis de 200 persoas participan desde este xoves e durante tres días no XII Congreso Internacional de Ciencias do Deporte e da Saúde, que se está desenvolvendo no Pazo da Cultura.
Organizado pola Vicerrectoría do Campus de Pontevedra, Concello, Departamento de Didácticas Específicas da Universidade da Coruña e Sportis Formación Deportiva, este congreso reune a investigadores e expertos chegados desde diferentes puntos de España, Arxentina, Uruguai, Colombia ou México.
A tratar, entre as 25 conferencias programadas, temas como a morte súbita no deporte, na que profundou o xefe dos servizos médicos de Boca Juniors, Guillermo Bortman, xunto aos seus compañeiros José Osemani e Heriberto Marotta.
Para o médico do coñecido club arxentino a morte súbita é un problema que "aparece moi poucas veces" no mundo do deporte e que "ten moito que ver coa prevención, con que os atletas non teñan patoloxías cardiovasculares que poidan desencadear epidosdios graves".
"Agora que o running está tan de moda en todo o mundo, é crucial facer estudos previos, saber se estás capacitado", sinalou Bortman.
Saúde, lecer, didáctica, rendemento, xestión deportiva e socioloxía e psicoloxía no deporte son as áreas sobre as que se estrutura o congreso na presente edición, con temas a tratar como a rehabilitación muscular nun deportista de alta competición ou os hábitos de vida saudables na poboación infantil, entre outros.