Ponte Caldelas converte o tramo do Balneario nunha gran zona de aparcamento para os días de feira
Por Redacción
O próximo domingo, día 5, Ponte Caldelas estrea un novo sistema de regulación do tráfico con motivo da celebración da feira. A principal novidade é que o tramo da avenida de Vigo que vai ao Balneario e remata na estrada de Soutomaior (PO-244) quedará convertido nunha gran bolsa de aparcamento durante o horario de celebración da actividade feiral, entre as 9.30 e as 13.30 horas.
A Policía Local explica que a decisión de cortar o acceso rodado dende as zonas de Soutomaior, A Insua, Regodobargo e Silvoso débese á conversión das inmediacións do Balneario en aparcamento nas dúas marxes da rúa, o que resultaba incompatible con manter a circulación en dobre sentido.
Esta decisión permitirá unha gran capacidade de estacionamento nos días 5 e 20 de cada mes.
Deste xeito, os vehículos que procedan destas zonas do sur do municipio deberán continuar ata Pazos para entrar pola ponte da Calzada e a avenida de Pontevedra. A partir de aí baixarán pola rúa de Concepción Arenal e terán o acceso franco ao aparcamento, xusto a carón da feira. A saída para todos os que aparquen nesta zona da avenida de Vigo, sempre que o fagan antes das 13.30 horas, será cara á PO-244.
A Policía Local considera que trátase dun deseño sinxelo e máis operativo da circulación rodada, pois introduce moi poucos cambios, dá maiores facilidades de aparcamento e non prexudica ao funcionamento da gardería infantil nin o acceso ordinario ao centro da Vila.
Con este operativo de tráfico o gobierno local pretende dar as máximas facilidades aos usuarios habituais da feira, unha vez que hai un mes tomouse a decisión de facer peonil o primeiro tramo da avenida de Vigo, onde se instalan os postos dos vendedores ambulantes. O alcalde, Andrés Díaz, ten subliñado que as xornadas feiradas de Ponte Caldelas levan aparellada unha gran actividade comercial e era preciso tomar medidas para potencialas ao máximo.