A pontevedresa Patricia Vilán será a portavoz do PSdeG-PSOE no Parlamento de Galicia
Por Redacción
Creada e actualizada
Creada e actualizada
A renuncia de José Luis Méndez Romeu a continuar sendo portavoz do PSdeG-PSOE no Parlamento de Galicia provocou movementos inmediatos na xestora socialista para afrontar esta crise. Este mércores 1 de xuño, a presidenta da xestora, Pilar Cancela, presentou a súa proposta ao grupo parlamentario co nomeamento da avogada pontevedresa Patricia Vilán como portavoz dos socialistas na cámara.
Patricia Vilán foi unha das catro parlamentarias que apoiou a Fernández Leiceaga nas primarias nas que saíu derrotado Méndez Romeu. A súa proposta tamén se corresponde coa intención desde as filas socialistas de renovar a imaxe do partido. A pontevedresa terá que afrontar este papel, unha vez que a aceptaron os deputados do grupo, ata a disolución do Parlamento ante a próxima cita coas urnas para escoller aos representantes autonómicos no outono.
A deputada pontevedresa sinala que "o noso obxectivo é gañar as eleccións e os nosos adversarios son o PP e Núñez Feijóo". Este mesmo mércores, o secretario de organización do PSdeG-PSOE, César Luena, visitará a sede socialista en Pontevedra para manter un encontro cos afiliados.