Barro estrea unha nova imaxe "moderna e acorde cos tempos"
Por Redacción
O Concello de Barro contará, a partir deste mércores 1 de xuño, cunha nova imaxe. Renóvase toda a identidade gráfica municipal buscando, segundo sinalan desde o goberno local, unha imaxe "moderna e acorde cos tempos".
Esta imaxe quere simbolizar a combinación entre a terra e a auga, "dous elementos da natureza imprescindibles para entender Barro como espazo físico e cultural e a nosa forma de vida", explica o goberno municipal.
Así, porase en marcha tamén unha nova páxina web que terá a transparencia na xestión municipal como obxectivo fundamental.
A páxina conta cun deseño actual que vai servir para mellorar a imaxe da institución cara o exterior, pero tamén vai ser moito máis funcional para os seus usuarios.
Esta nova páxina vai posibilitar unha maior información sobre o funcionamento do concello, daralle posibilidades a todos os usuarios de acceder a trámites e documentos sen necesidade de ter que ir as oficinas, será unha canle máis de participación cidadá e tamén vai servir para aumentar a transparencia da institución municipal tanto no que se refire á corporación municipal coma á contratación, licitación de obras, provedores ou resolución de concursos.
En definitiva, este portal "vai servir para que todos os veciños e veciñas poidan coñecer de primeira man o día a día do concello, pois colgarase toda a información que permita a lei".
O goberno municipal destaca que este é o inicio dun proceso de modernización que nos próximos meses "irá incorporando moitos máis datos e se irá mellorando en todo o que sexa necesario", sendo ademais "unha fiestra aberta ao mundo para dar a coñecer Barro e todas as súas potencialidades".