A túa farmacia axúdache a deixar de fumar
Por Redacción
A Organización Mundial da Saúde celebra este martes 31 de maio o Día Mundial Sen Tabaco e o Colexio de Farmacéuticos de Pontevedra desenvolve unha campaña a partir deste 30 de maio ata o 5 de xuño baixo o lema "Tes só unha vida. Protéxea!" dentro das iniciativas postas en marcha na provincia dentro do proxecto "A túa Farmacia axúdache".
Nas farmacias durante esta semana concienciarán aos fumadores sobre os beneficios que leva deixar o hábito. O Colexio de Farmacéuticos editou dípticos con información sobre tabaquismo e asesoramento para deixar de fumar, que estarán a disposición do público.
O martes 31 ás 19.00 horas terá lugar unha charla sobre tabaquismo baixo o título "Deixar de fumar é posible", que se impartirá na sede de Pontevedra do Colexio de Farmacéuticos na rúa Echegaray. Tamén se poderá seguir a través de videoconferencia na sede do colexio en Vigo, situada na Avenida Camelias.
A charla estará aberta ao público e nela abordarase a importancia da prevención, os riscos do tabaco para a saúde e as alternativas para deixar de fumar. Tamén se tratará a medida que preconiza a OMS de establecer un empaquetado neutro do tabaco para diminuír o seu atractivo a través da prohibición do uso de logotipos, cores, imaxes de marca ou información sobre o envase.