O socialista Enrique Vaqueiro pide a dimisión do voceiro de Ciudadanos na Lama por chamalo "señorito lisensiado"
Por Redacción
O portavoz do PSdeG-PSOE no Concello da Lama, Enrique Vaqueiro, pide a dimisión do portavoz de Cidadáns nese concello, Andrés Cal, por uns comentarios publicados na rede social Facebook nos que, segundo o socialista, burlábase do seu acento mexicano.
No escrito, Andrés Cal felicitaba aos alumnos do Instituto de Caldelas pola súa gradación e lamentaba a ausencia do alcalde da Lama, Jorge Canda, no acto do mesmo xeito que a do portavoz do PSOE e da súa parella cualificándoos como "señoritos lisensiados", unha expresión que ao edil socialista parécelle xenófoba ao entender que se trata dunha "clara burla ao seu acento por nacer en México".
Ante este feito, Vaqueiro anuncia que vai presentar un escrito ao coordinador de Ciudadanos en Galicia para comprobar se aproba ese comportamento do seu representante na Lama.
Segundo Vaqueiro, este enfrontamento nace desde que no último pleno, o PSOE presentou unha moción para a apertura dun Consulado de México en Vigo, que contou co apoio do alcalde e do resto de concelleiros do PP. Con todo, o concelleiro de Ciudadanos cualificou a moción de "inútil" ao entender que "había que preocuparse máis polos españois e non polos mexicanos", segundo a versión do portavoz socialista.
Relacionadas:
-
O PSOE e o alcalde da Lama condenan as pintadas ameazantes na casa do concelleiro Enrique Vaqueiro
Por Redacción | Creada e actualizada