Medio Ambiente dispoñerá de 100.000 euros para mellorar os parques infantís de Sanxenxo
Por Redacción
O orzamento do Concello de Sanxenxo para 2016 recolle un Plan Director de Parques Infantís e Espazos Públicos dotado con 100.000 euros e que permitirán á concelleira de Medio Ambiente, Coral González-Haba, levar a cabo en catro anualidades unha reestruturación global destes espazos públicos
Coral González-Haba pretende, durante o presente mandato, certificar e homologar todos os parques infantís do municipio, xa que moitos deles incumpren na actualidade a normativa autonómica.
A Concellería de Medio Ambiente comezou por inventariar os parques, para continuar coa elaboración dun informe que contemple as deficiencias dos elementos de xogo, así como a posible eliminación de portas e valos; así como a revisión con acelerómetros da HIC (altura crítica de caída) e a eliminación non só da sucidade senón tamén do óxido, entre outras cuestións que garantan a seguridade dos menores.
O Plan Director permitirá que a Concellería de Medio Ambiente se centre na recolocación e redeseño dos actuais parques, podendo utilizar para iso aqueles elementos de xogo que estean en bo estado. Un exemplo diso sería o parque de Magaláns, na parroquia de Dorrón, que a edil quere achegar ao centro escolar. Acordado coa comunidade educativa, a intención do departamento de Medio Ambiente é trasladar os elementos de xogo aos terreos municipais anexos ao colexio, facilitando así que os nenos dispoñan dunha área propia na que gozar do seu tempo de descanso.
"Queremos instaurar un novo concepto das áreas de xogo, converténdoas en máis seguras e máis funcionais e para iso non é suficiente con substitucións puntuais senón que é necesaria unha actuación moito máis ambiciosa", explica Coral González-Haba. A edil engade que son moitos os elementos de xogo que poderán ser reutilizados, co obxectivo de optimizar os recursos municipais e conseguir que os espazos de lecer para a poboación infantil estean nun estado óptimo sen gravar as arcas municipais.
A concelleira de Medio Ambiente prestará tamén unha especial atención aos parques biosaudables, ao considerar que son zonas moi necesarias para a terceira idade. Ademais, unha das súas prioridades é a instalación de aparellos de xogo para nenos con algún tipo de discapacidade, elementos que pretende colocar nos parques máis concorridos e que a nova partida orzamentaria permitiralle acometer.
O Plan Director inclúe tamén un apartado para os espazos públicos. Nesta sentido Coral González-Haba considera que unha das prazas nas que resulta prioritario actuar é a de Fonte de Ramos, incidindo na súa humanización, iluminación e limpeza co obxectivo de conseguir que se converta nun lugar de encontro frecuentado e utilizado polos cidadáns.