Piden seis anos e medio de prisión para un home acusado de fotografar espido un menor
Por Redacción
A Audiencia de Pontevedra xulgará o vindeiro martes un home que está acusado dun delito de corrupción de menores, para o que Fiscalía solicita seis anos e medio de prisión por facer fotografías de carácter sexual a un menor.
Segundo o escrito de acusación, durante o verán de 2012, o acusado cando se atopaba a soas co menor, que no momento dos feitos tiña menos de dez anos, dedicábase a facerlle fotografías e pedíalle que se espise.
Nese momento, o home traballaba nunha empresa de transportes e compartía a súa furgoneta con outro compañeiro. O fiscal relata como foi este, con ocasión de limpar o vehículo, o que atopou un pen drive que contiña ata 22 fotografías do menor, en 17 das cales estaba espido ou semiespido e adoptaba posturas de carácter sexual.
Ademais da pena de prisión, o fiscal solicita á Sección Segunda da Audiencia de Pontevedra que se lle prohiba achegarse polo menos a menos de 300 metros, en calquera lugar no que se atope, ou comunicarse con el por espazo de sete anos e medio, a contar desde que salga do cárcere correspondente.
O caso procede do xulgado de instrución número 2 de Lalín.