Que lle imos facer! Chove na fin de semana
Por Redacción
Neste venres, Galicia continúa baixo a influencia da borrasca de días anteriores que manterá a inestabilidade atmosférica cunha fronte que se irá achegando ao litoral cara á madrugada do sábado. Así, os ceos alternarán entre nubes e claros, medrando nubes de evolución á tarde que deixarán chuvascos con tormentas ocasionais nas Rías Baixas; xa pola noite comezarán chuvias máis persistentes polo litoral oeste. As temperaturas mínimas ascenderon lixeiramente mentres que as máximas non terán cambios siginificativos. Os ventos soprarán de compoñente sur, frouxos no interior e moderados no litoral atlántico.
O tempo durante a xornada do sábado virá marcado pola presenza de baixas presións preto de Galicia, que aportarán moita inestabilidade, segundo informa o Servizo de MeteoGalicia. Deste xeito teremos ceos parcialmente cubertos, con chuvascos puntualmente de forte intensidade e ocasionalmente treboentos. As temperaturas mínimas ascenderán moderadamente mentres que as máximas experimentarán un lixeiro descenso. Os ventos soprarán moderados de compoñente sur.
Durante o domingo 29 persistirá a inestabilidade atmosférica sobre Galicia. Con esta situación agárdanse ceos moi anubrados con chuvascos frecuentes que puntualmente acadarán forte intensidade e ocasionalmente virán acompañados de aparato eléctrico. As temperaturas sufrirán un lixeiro descenso. Os ventos soprarán de compoñente oeste, frouxos en xeral.
Galicia quedará nunha área intermedia durante a vindeira semana entre as baixas presións de días anteriores e o anticiclón que dominará a partir do martes. O luns, a partir do mediodía, haberá unha alternancia de nubes e claros con nubes de evolución que poderían deixar algún chuvasco illado e ocasional. As temperaturas mínimas descenderán lixeiramente, pero as máximas comezarán a ascender. Os ventos soprarán moi frouxos de compoñente oeste, tendendo a rolar a norte durante a tarde.