Domino's Pizza busca traballadores para o local que abrirá en Pontevedra no mes de xuño
Por Redacción
A cidade de Pontevedra contará este verán cun establecemento da cadea Domino's Pizza, unha empresa norteamericana especializada na elaboración de pizzas e en comida rápida.
O grupo Zena, que asume a posición de "master franquía" en España desde 2009 e ata 2019, está na actualidade buscando a catro traballadores para cubrir os postos de repartidores a domicilio na cidade con soldos que oscilan entre os 8.000 e os 10.000 euros brutos anuais. A entidade previamente xa realizara entrevistas de traballo para seleccionar ao persoal que se encargará da xestión da franquía en Pontevedra.
A empresa de comunicación que xestiona a información da cadea de pizzas confirmou a PontevedraViva a apertura deste establecemento na cidade no mes de xuño. Con todo, polo momento os responsables da apertura sinalan que se están realizando as obras no local e non queren indicar en que punto concreto da cidade abrirán o Domino's Pizza de Pontevedra.
Diversas fontes indicaron a PontevedraViva que o promotor tanteou varios baixos da cidade entre os que destaca un local situado entre a Pasarela de 12 de novembro e a rúa Loureiro Crespo, que foi descartado polo seu elevado prezo de aluguer.
A empresa de pizzas conta con dous establecementos en Vigo, na praza da Independencia e en Pizarro. A cadea dispón de máis de 11.000 establecementos en máis de 70 países.