Dúas carpas cubrirán toda a Alameda de Ponte Caldelas para a Festa da Troita
Por Redacción
As malas previsións meteorolóxicas previstas para os próximos días levaron ao Concello de Ponte Caldelas a tomar dúas decisións relativas á Festa da Troita, a máis drástica a de suspender a verbena do sábado pola noite.
A Festa manterá os actos gastronómicos gracias á contratación dunha gran carpa que encaixa entre a liña de árbores da Alameda e que acollerá as casetas de degustación da troita. Ao mesmo tempo instalarase outra carpa máis pequena para a elaboración do polbo, que é unha novidade deste ano e que se quere manter polo aliciente que achega.
A verbena, contratada coas orquestras Gran Parada e Pontevedra, será trasladada ao mes de agosto, e incluída nas Festas dos Dolores, co que o Concello asegúrase non perder os cartos nunha actuación que podería terse que suspender a última hora, ou que, no mellor dos casos, se convertería nun fracaso de público, segundo o goberno municipal.
Así as cousas, a gran carpa abrirá ás 19 horas do sábado e en xornada de mañá e tarde o domingo. Ás 12.30 horas do domingo inaugurarase a escultura conmemorativa do medio centenario da festa, obra do escritor Ortiz. Ao mesmo tempo, celebraranse todos os actos relacionados con Concurso de Pesca Deportiva.
O festival folclórico do domingo pola tarde, a cargo da banda de gaitas Os Coribantes e do grupo A Roda, queda pendente da evolución do tempo.
As previsións de MeteoGalicia dan un 80% de probabilidade de choiva para as xornadas do venres, sábado e domingo, incluíndo posibilidade de tormenta, o que obrigou a tomar a decisión de suspender a verbena, tanto por razóns económicas como de seguridade.
"Optamos por cubrir con carpas e asegurar o certame gastronómico, que é a esencia da Festa da Troita", explicou o alcalde. "En Galicia non é habitual suspender verbenas, e menos aínda trasladalas, pero este goberno gusta de xestionar con responsabilidade e non ten medo a tomar decisións. A nosa obriga é previr accidentes e gastar correctamente o diñeiro público", concluíu.
CRÍTICAS DO PP
Pola súa banda, o Partido Popular de Ponte Caldelas cualificou de "lamentable" a decisión de de suspender a verbena da Festa da Troita.
"Se en fin de ano si que podía haber orquestra e carpa non entendemos porque agora non se pode facer o mesmo", aseguran os concelleiros populares, que lamentan que non se traslade a outra data fóra das Festas dos Dolores, que xa de seu "son outro momento de gran movemento para a hostalería local".
Relacionadas:
-
Ábrese a gran carpa da Alameda de Ponte Caldelas para acoller a Festa da Troita
Por Redacción |
-
Ponte Caldelas rectifica e manterá parte da verbena da Festa da Troita
Por Redacción |
-
Troitas para todos en Ponte Caldelas
Por Redacción |
-
A contorna da praia da Calzada xa está "en perfecto estado" de cara ao verán
Por Redacción |
-
Unha escultura de Ortiz conmemorará os 50 anos de historia da Festa da Troita
Por Redacción |