A Deputación cumpre os prazos do pago a provedores antes de 30 días
Por Redacción
A Deputación Provincial de Pontevedra aportou este sábado datos sobre os seus pagos a provedores relativos aos catro primeiros meses do ano en curso para dar a coñecer que no que vai de 2016 pagou as súas facturas antes do prazo determinado pola lexislación vixente, que establece o límite de pago en 30 días naturais desde a súa presentación.
Os mellores datos foron os do mes de abril, cando a Deputación pagou aos seus provedores a 20 días, isto é, dez días antes do prazo fixado. No mes de marzo o pago fíxose catro días antes, en febreriro foron seis días antes e en xaneiro, catro.
Á vista dos datos, o goberno provincial presume de que "cumpre o seu obxectivo de optimizar e axilizar" o pagamento a provedores con respecto á práctica do goberno anterior. Para logralo, nos últimos meses reforzouse o persoal do servizo de Intervención que se dedica a estas tarefas.
A institución provincial insiste en que, á vista das cifras, "cumpre folgadamente" cos requisitos marcados pola Lei Orgánica 2/2012 de 27 de abril de estabilidade orzamentaria e sustentabilidade financeira e polo Real Decreto 635/2014 de 25 de xullo polo que se desenvolve a metodoloxía de cálculo do período medio de pago a provedores das administracións públicas.