O PP define unha estratexia da campaña "en positivo" para o 26-X
Por Redacción
O Partido Popular de Pontevedra comezou este sábado a carreira electoral de cara ás eleccións xerais do 26 de xuño cunha reunión do comité de campaña coas persoas que conforman a candidatura do partido na provincia. O encontro tivo como obxectivo de coordinar e organizar todo o calendario do partido de cara aos próximos comicios, unha campaña da que a número 1 ao congreso, Ana Pastor, destacou que será "en positivo".
"Gobernamos durante catro anos e traballamos duramente para que España, Galicia e Pontevedra teñan hoxe moitas máis oportunidades", destacou a ministra de Fomento en funcións, e indicou que o obxectivo do PP é que "nos próximos anos haxa 20 millóns de españois traballando".
Antes do encontro, o presidente provincial do PP de Pontevedra, Alfonso Rueda, sinalou que os cidadáns coñecen as propostas do partido e "saben o que ofrecemos e como traballamos", pero no que ten que incidir a agrupación de cara ás vindeiras eleccións é en que "o Partido Popular foi coherente desde o primeiro momento".
No PP son "perfectamente conscientes" de que é unha repetición de eleccións, pero tamén de que nestes catro meses pasaron moitas cousas, polo que o PP vai a volver a incidir no que queren facer para gobernar, "explicamos desde o primeiro momento o que faríamos se as persoas nos dan a súa confianza, e non temos que estar dicindo a que renunciaríamos nin con quen teríamos que falar para sacar de diante aos que gañan, como pasou nestes catro meses".
Segundo explicou, o PP vai facer unha campaña moi pegada á rúa, de estar moito tempo fóra, de ver a moitos colectivos e de estar con representantes de toda a sociedade. "Todo aquel que nos queira escoitar, en todas partes onde poidamos dar a nosa mensaxe, alí vai estar un candidato ou candidata do PP explicando por que nos presentamos ás eleccións co obxectivo de gañar", indicou.