Franco aínda ten honores no Grove, pero vánllos quitar
Por Redacción
Francisco Franco é, dende o ano 1949, fillo predilecto e alcalde honorario do Concello do Grove e ten concedida a Medalla de Ouro do municipio. O actual equipo de goberno entende que, en cumprimento da lei de memoria histórica e da moción pola memoria histórica aprobada polo Pleno do Concello do Grove en novembro de 2008, eses honores deben ser retirados e así o trasladará á próxima sesión plenaria.
O grupo de goberno presentará unha moción ao vindeiro Pleno na que solicita retirar os honores de fillo predilecto, alcalde honorario e a Medalla de Ouro ao ditador, facer constar a retirada nas actas municipais e no arquivo histórico do Concello e engadir un encarte nas actas do Pleno do 20 de setembro de 1949 no que se aprobou o nomeamento de tal maneira que se faga constar esta moción e a consecuente retirada de honores para que dita circunstancia quede claramente explicada para xeracións vindeiras.
Na moción, o grupo de goberno lembra que o 24 de novembro de 2008 o Pleno da Corporación aprobou unha moción presentada polo BNG instando ao cumprimento da lei de memoria histórica pola que se adicaba unha rúa ao alcalde Xacobe Barral Otero, acordo que puido cumprirse o pasado 14 de abril, case oito anos despois da aprobación da moción.
A pesar dese acordo, quedan outros aspectos pendentes de cumprimento, de aí que o grupo de goberno considere que "pasadas as páxinas máis escuras da historia do noso país, é de rigor corrixir aquelas cousas que son corrixibles buscando a xustiza sobre as que non o son".