Comproban en Silgar como un "dron socorrista" tarda dez segundos en achegar un flotador a un bañista en apretos
Por Redacción
A praia de Silgar foi o escenario elixido esta mañá pola Mancomunidade do Salnés para que os alumnos que participaron no curso de manexo de drons puidesen facer unha exhibición sobre a aplicación desta tecnoloxía ao salvamento en praias.
A idea é que un dron, que debe ser manexado por dous técnicos especializados, achegue o salvavidas ao bañista que estea en apretos, gañando con esta medida uns minutos que poden ser decisivos á hora de salvar unha vida.
O dron non substituiría a un socorrista, máis ben facilitaría o seu labor. E é que segundo explicaron desde a empresa que imparte este curso para a Mancomunidade, Telecrea, no momento en que un bañista en risco de afogamento recibe o salvavidas, o seu nivel de adrenalina baixa, co que o labor de rescate do socorrista é máis fácil.
O dron non substituiría a un socorrista, máis ben facilitaría o seu labor
Desde o centro da praia de Silgar, e con baixamar, un dron tardou ao redor de 10 segundos en alcanzar ao suposto bañista que estaba en risco, cunha diferenza de varios minutos respecto da lancha de salvamento que acudía no seu auxilio. Trátase dun dron anfibio, o que lle permite aterrar sobre a auga, e mesmo mergullarse no caso de que fose necesario.
Os drons poden utilizarse non só para achegar un flotador en caso dun rescate, senón que tamén pode axustárselle un altofalante e ser utilizado entón para que os socorristas poidan advertir aos bañistas de que se penetran nunha zona de correntes ou de calquera outro perigo, sería unha especie de "dron aia" que incrementaría a seguridade nos areais nos que poida ser utilizado.
Ao acto asistiu tanto o alcalde de Sanxenxo, Gonzalo Pita, como o concelleiro de Turismo, Suso Sueiro e o xerente da Mancomunidade do Salnés, Ramón Guinarte, que coincidiron en destacar a importancia que a aplicación desta nova tecnoloxía pode ter no salvamento en praias.
A Mancomunidade é pioneira na organización destes cursos formativos e no caso concreto dos pilotos de dron explora diferentes opcións para a inserción laboral duns profesionais que, tras un curso de máis de 100 horas, poden achegar a súa experiencia en diferentes campos.