Cidadáns propón que os locais con permiso para reproducir música poidan organizar concertos
Por Redacción
O grupo municipal de Cidadáns (C's) está a preparar unha modificación da regulación municipal relativa á música nos locais de Pontevedra co obxectivo de que os locais de lecer que teñan autorización para reproducir música poidan organizar concertos en directo.
Cidadáns deu a coñecer esta iniciativa este xoves a través dun comunicado tras reunirse con representantes da asociación Músicos ao Vivo e a Asociación de Empresarios da Verbena de Galicia (ASEVEGA).
A reunión, á que asistiron Manuel Alonso e Víctor Franco, do primeiro colectivo, e Merchi Treviño, do segundo, organizouse co obxectivo de coñecer as necesidades do sector e poñer en común a proposta de modificación.
O grupo municipal de Cidadáns recolleu o criterio profesional destas organizacións para cumprir co obxectivo de mellorar a actividade cultural da cidade e a oferta de lecer dos locais pontevedreses para reactivar a vida nocturna da cidade, sobre todo, para a tempada estival.
Respecto diso, a concelleira de Cidadáns, María Rey, afirmou que "a música como parte da nosa cultura debe ser potenciada e, para iso, os protagonistas deben ter espazos á súa disposición onde mostrar as súas creacións".