A Xunta renova a pintura nas estradas autonómicas pontevedresas
Por Redacción
Xa están en marcha os traballos de mantemento nos máis de 740 quilómetros da rede autonómica de estradas na provincia de Pontevedra. A Xunta de Galicia iniciou nos últimos días a limpeza das marxes e, en canto o tempo o permita, renovarase a sinalización horizontal de todos estes viarios.
Trátase sobre todo de rozas e repintados que deben facerse durante esta época, cando xa xerminaron as especies herbáceas, con tempo seco. A limpeza das cunetas incrementa, ademais, a efectividade da estrada para cortar o paso do lume en caso de incendio.
As actividades de mantemento, roza e segado da vexetación nas marxes das estradas iniciáronse na última semana de abril, empezando nas zonas onde a vexetación, por particularidades climáticas ou biolóxicas, presenta un estado máis avanzado.
Deste xeito, increméntase a seguridade na circulación ao mellorar as condicións de visibilidade e diminuír a presenza de materia potencialmente escorregadiza, optimiza a capacidade de evacuación dos sistemas de drenaxe da estrada (cunetas, tubos...), evitando estancamentos por vexetación, favorece a percepción da irrupción de animais na calzada con maior antelación permitindo dispoñer dun maior tempo de reacción ao condutor para evitar posibles colisións e ademais, o aspecto limpo disuade de posibles verteduras incontroladas.
A renovación da sinalización horizontal consiste, na súa parte fundamental, no repintado das marcas viarias. Nesta campaña está previsto o repintado de ao redor de 350 quilómetros de estrada. Os traballos se iniciarán en canto a climatoloxía sexa favorable e serán completados nos meses de verán.