A pontevedresa Lucía Pedroso, na audiencia co Rei
Por Redacción
A presidenta da Asociación de Jóvenes Empresarios (AJE) de Pontevedra, Lucía Pedroso, participou este mércores na audiencia concedida polo Rei Felipe no Palacio da Zarzuela á comisión executiva da Confederación Española de Asociacións de Jóvenes Empresarios (CEAJE) tras as eleccións celebradas o 29 de xaneiro, nas que resultou reelixido como presidente Juan Merino Sánchez.
A CEAJE representa a 18.500 empresarios menores de 41 anos. É unha organización multisectorial na que se integran 21.000 pequenas, medianas e grandes empresas, e que agrupa a 55 asociacións provinciais e federacións autonómicas.
A xunta directiva de CEAJE ofreceu ao monarca a presidencia de honra dos próximos eventos da organización, como o Congreso Nacional de Jóvenes Empresarios e o Premio Nacional Joven Empresario.
O XX Congreso Nacional de Jóvenes Empresarios celebrarase en Málaga o próximo mes de novembro e reunirá a máis de 700 empresarios baixo o título "Reset, cambia a fórmula" e cunha idea común: poñer de manifesto que o talento é o maior capital.
O XV Premio Nacional Joven Empresario terá lugar en Granada nunha data pendente de confirmación.