Investigan un mozo meco polo roubo de polbo e xoias en vivendas do Grove
Por Redacción
A Garda Civil do Posto do Grove investiga a A.M.P., de 24 anos, un veciño desta localidade como presunto autor de dous delitos de roubo no interior de senllos domicilios nesta localidade.
Segundo informaron fontes policiais do Instituto Armado, o pasado luns día 9, un veciño denunciou ante a Garda Civil que ao regresar dunha viaxe que realizara a Portugal atopouse coa porta da súa vivenda forzada notando que lle subtraeran varias xoias e unha determinada cantidade de polbo que tiña no frigorífico.
Por mor da información achegada polo dono da vivenda e as indagacións realizadas, os axentes identificaron e localizaron ao suposto autor, despois de ter noticias de que tentara vender o polbo a varios veciños. En consecuencia, notificóuselle a súa situación de investigado como suposto autor dun delito de roubo con forza nas cousas.
Esta mesma persoa tamén está a ser investigada como presunto autor doutro roubo perpetrado o pasado mes de abril, neste caso duns aparellos de pesca.
A denuncia deste roubo formulouse no Posto do Grove o día 24 de abril e nela o propietario do inmoble refería que lle subtraían unha carreta con cinco aparellos de pesca que gardaba no interior do baixo da súa vivenda, ao que entraran despois de forzar o cadeado da porta.
As dilixencias instruídas pola Garda Civil foron entregadas no Xulgado de Cambados, onde deberá comparecer o investigado cando sexa citado.