Os socorristas de Sanxenxo cobrarán este verán un mínimo de 1.187 euros brutos
Por Redacción
Dos 1.187,28 euros brutos dos socorristas e sanitarios aos 1.428,11 euros dos xefes de posto (dez en total). É o salario que cobrarán finalmente os integrantes do persoal que conformará este verán o servizo de vixilancia en praias en Sanxenxo. Os que queiran participar neste proceso de selección poderán anotarse ata este mércores 11 de maio.
Serán un total de 60 socorristas e sanitarios os que o Concello de Sanxenxo quere sumar ao seu persoal este verán. Quince deles terán un contrato de 3 meses e os outros 45 serán contratados por un período de dous meses.
Aínda que o proceso de selección é moi similar ao de edicións anteriores, este verán o Concello optou pola creación dunha bolsa de traballo, na que cada aspirante figurará coa puntuación obtida tras a realización das probas e a súa contratación decidirase en función deste baremo.
Ademais da solicitude, os aspirantes deben achegar a fotocopia do DNI, un certificado médico oficial acreditativo de non padecer enfermidade ou discapacidade que impida exercer a función para desenvolver, o currículo con fotografía recente e a copia cotexada do título esixido nas bases da convocatoria para cada praza ou a declaración ou certificado de estar en condición de obtelo.
As probas selectivas realizaranse o día 16 de maio. Este ano será a praia de Silgar o escenario das probas físicas. Os aspirantes daranse cita ás 9.30 horas no areal para realizar as probas establecidas, que consistirán en correr 200 metros pola area co material de salvamento (aletas e flopi), entrar na auga e nadar 800 metros ata unha aboia e superar outros 200 metros de carreira pola praia portando as aletas e o flopi.
Posteriormente trasladaranse ao Pazo Emilia Pardo Bazán de Sanxenxo, onde os candidatos deberán acudir co seu documento nacional de identidade. Alí terán lugar os exames teóricos xenerais e, posteriormente, a proba de reanimación cardio-pulmonar básica para as persoas que optan aos postos de sanitarios.
As persoas que concorran aos postos de sanitarios ademais de superar o exame de reanimación cardio-pulmonar básica terán que contestar a un test que versará sobre primeiros auxilios como poden ser pautas xerais ante un accidentado, valoración do accidentado, reanimación cardio-pulmonar, arterioesclerose-ateroscleroe, hemorraxias, feridas, traumatismos e politraumatismos, shock, cadros convulsivos, trastorno pola calor, lesións e trastornos polo frío, intoxicacións pola vía dixestiva, picaduras e mordeduras, intoxicacións por drogas, transportes de accidentados e asfixias.
Pola súa banda, os aspirantes a socorristas terán que demostrar tamén os seus coñecementos acerca de primeiros auxilios e ademais sobre temas relacionados co salvamento acuático como os seus principios xerais, secuencia de actuación, técnicas de entrada na auga, flotacións, técnicas de natación adaptadas, mergullo, técnicas de control e de remolque directas, de utilización do material de rescate, técnicas para o rescate de accidentados de columna, de respiración artificial no medio acuático, de extracción de accidentados, de salvamento acuático en espazos naturais e comunicacións.
Relacionadas:
-
Comproban en Silgar como un "dron socorrista" tarda dez segundos en achegar un flotador a un bañista en apretos
Por Redacción |
-
Sanxenxo destinará 233.401 euros a contratar socorristas
Por Redacción |
-
Sanxenxo incentiva a selección de socorristas e sanitarios cun incremento salarial do 18%
Por Redacción |