Chuvia e temperaturas agradables durante os vindeiros días nas Rías Baixas
Por Redacción
A meteoroloxía durante este xoves quedará marcada, segundo o servizo de Meteogalicia, pola entrada dunha masa de aire algo máis fría en capas medias e altas da atmosfera, que xunto á presenza de aire cálido en superficie provocará inestabilidade. Desta forma, os ceos permanecerán nubrados con choivas irregularmente repartidas, ocasionalmente de cáracter tormentoso pola tarde no interior. As temperaturas mínimas ascenden pero as máximas baixan situándose entre os 16 e os 25 graos. Os ventos serán frouxos de dirección variable.
As Rías Baixas quedarán a partir do venres 6 nunha situación de ceos cubertos con choivas intermitentes a primeiras horas da mañá. Ao longo do día abriranse claros. As temperaturas descenderán, especialmente as máximas situándose sobre os 20 graos. O vento soprará frouxo de compoñente norte.
Durante a xornada do sábado, unha borrasca irase achegando a Galicia polo oeste. A mañá será de ceos parcialmente cubertos. Co avance da tarde comezarán os chuvascos no sur da provincia. As temperaturas mínimas e máximas sufrirá un moderado descenso. O vento soprará de compoñente sur, frouxo pola mañá aumentando a moderado pola tarde.
O domingo 8, as baixas presións atlánticas afectarán as Rías Baixas de maneira que se rexistrarán choivas, frecuentes e xeneralizadas durante a mañá e algo máis irregulares durante a tarde. A inestabilidade manterase durante a próxima semana con ceos parcialmente nubrados e chuvascos intermitentes. As temperaturas situaranse ao redor dos 20 graos.