30 novos colectores de orgánicos para mellorar a recollida de lixo en Barro
Por Redacción
O Concello de Barro está realizando diferentes actuacións para mellorar a recollida municipal de lixo, entre as que está previsto que nos vindeiros días se instalen 30 novos colectores de orgánicos en varias zonas do municipio en sustitución dos actuais que se encontran en mal estado.
Ademais, está previsto aumentar o número dos recipientes específicos para o cartón e, froito dunha mellora conseguida na compra deses 30 colectores, a empresa Urbaser realizará unha limpeza de todos os depósitos de lixo e irá anclando colectores das illas de reciclaxe ao longo do ano. A serie de actuacións completarase coa adquisición de tres marquesinas.
Con estas medidas, a Concellería de Servizos, que dirixe José Sanmartín, avanza na idea de recuperar e reciclar como medida de aforro e así poder estabilizar os custes da recollida do lixo e o seu tratamento. Nunha decidida aposta pola compostaxe, o obxectivo é darlle aos veciños alternativas ecolóxicas para os residuos.