Recollen sinaturas de apoio ao traballador da Deputación ameazado nunhas pintadas
Por Oskar Viéitez
Un grupo de traballadores da Deputación iniciou unha recollida de sinaturas en apoio ao coordinador das brigadas do Servizo de Mobilidade que a semana pasada atopou toda a rúa na que vive chea de pintadas con insultos e ameazas contra a súa persoa.
No documento asinado polos seus compañeiros da administración provincial recóllese que con esta acción "se insultou, ameazou e atacou a dignidade de todos os traballadores do Servizo de Mobilidade".
Do mesmo xeito critican a resposta que deu o sindicato Comisións Obreiras que "xustificando este tipo de prácticas e, lonxe de rexeitalas e condenalas, calificaba as mesmas como normal dentro do conflito laboral que está a vivir o Parque de Maquinaria da Deputación".
Lembran que o sistema democrático actual dispón de distintos mecanismos para facer valer as reivindicacións, por iso lles "chama a atención" que "teñan que recurrir ao tipo de prácticas delictivas e ‘mafiosas’ que están a emplear contra traballadores e responsables políticos de esta administración".
Finalmente se dirixen ao sindicato Comisións Obreiras para que saiba que "cando forma parte destas prácticas, sin rexeitalas nin condenalas senón incitándoas, xustificándoas e apoiándoas, están a atacar, insultar, ameazar e coaccionar non a un traballador ou a un responsable político senón a todos nós".
POSTURA DO PP
Pola súa banda, a voceira do grupo provincial do Partido Popular, Nidia Arévalo dixo que "non estamos de acordo con este tipo de actitudes" e sobre as accions legais que anunciou a presidenta da Deputación, Carmela Silva, dixo que "se ten que tomar medidas que as tome".
O grupo provincial do Partido Popular pediu este martes ao goberno da Deputación de Pontevedra que inicie o diálogo cos traballadores do parque de maquinaria e busquen unha solución consensuada para poñer fin a este conflito. Critican a "inacción" do goberno provincial, e piden ao goberno provincial que "reconduza" esta situación e estableza, "de forma urxente", o diálogo cos traballadores para "intentar rematar cun conflito que cada día parece agravarse máis".
Mediante unha moción que defenderán no próximo pleno provincial, os populares tamén esixirán que o bipartito "renuncie a desmantelar o Parque de Maquinaria, e que fagan un servizo rentable e optimizado".
Como explicou o deputado Luis Aragunde, a proposta que fixo a presidenta da Deputación "non é funcional nin operativa", xa que "as horas efectivas de traballo son case a metade".
Por este motivo, a deputada Nidia Arévalo adiantou que desde o grupo do PP esixirán que o parque funcione "ao 100 por cento".