Nos primeiros días de maio, quita o saio
Por Redacción
A influencia anticiclónica permanecerá sobre as Rías Baixas e sobre toda Galicia durante esta fin de semana na que chega o mes de maio, segundo as previsións do servizo de Meteogalicia.
Durante a xornada do domingo, 1 de maio, as temperaturas mínimas se encontarán ao redor dos 8 graos mentres que as máximas superarán os 20 graos. O ceo manterase pouco nubrado con presenza dalgunhas nubes de tipo alto. Os ventos soprarán do nordés en xeral, frouxos, con intervalos de moderado no litoral.
Manteranse as altas presións durante o luns coa entrada de aire cálido procedente do sur peninsular. O ceo permanecerá pouco nubrado con nubes de tipo alto. As temperaturas, tanto mínimas como máximas, atoparanse en ascenso situándose entre os 8 e os 22 graos. O vento seguirá soprando do nordés, moderado no litoral.
Ata o mércores da próxima semana, as condicións meteorolóxicas serán de tempo seco e temperaturas altas. A partir do xoves comezará un período de inestabilidade atmosférica. De forma que aumentará a probabilidade de precipitacións, en forma de chuvascos e cun descenso das temperaturas, que se irá incrementando cara ao fin de semana. Neses días será necesario volver poñer o saio, se cadra ata o corenta de maio, como indica o popular refrán.