Ponte Caldelas traballa en diferentes melloras en Anceu, Barbudo e A Sorreira
Por Redacción
O bo tempo dos últimos días permitiu que puideran comezar os traballos de reparación e asfaltado da estrada que comunica as parroquias de Anceu e Barbudo, unha actuación que se estenderá a outros lugares do municipio como Chaín ou Portasouto.
O alcalde, Andrés Díaz, pediu disculpas aos veciños pola espera e polas molestias que lles está a xerar pero "espero que entendan que os cartos a empregar nestes traballos son considerables e a nosa responsabilidade nos obriga a empregalos do xeito máis correcto e eficiente posible".
Neste sentido, recordou que se botou unha capa provisional de xabre na estrada para mellorar de forma temporal a estrada, pero agora que o tempo o permite "estamos acometendo a reparación integral deste vial nas condicións axeitadas".
Estes traballos se suman ás actuacións relacionadas co subministro de auga, ademais dun gran número de obras de pequena entidade pero "de gran relevancia e importancia" para solucionar problemas que padecen os veciños deste ámbito e que desde hai décadas estaban sen resolver.
Tamén se executarán este ano obras como o asfaltado viario que vai ao encoro cun custo superior aos 70.000 euros, ademais do asfaltado do vial que vai de Barbudo a Chaín, cun custo duns 100.000 euros.
SOLUCIÓN PARA A SORREIRA
Ademais, o Concello de Ponte Caldelas encargou a unha empresa especializada o rebaixe e eliminación dunha pedra enorme no lugar de A Sorreira, como consecuencia dunha petición veciñal para garantir a seguridade na zona e facilitar un mellor tránsito para os vehículos á hora de acceder ás vivendas.
O alcalde e o xefe de obras comprobaron "in situ" as dificultades de execución que precisa esta obra que tivo un pequeno retraso precisamente porque ao iniciarse os labores detectouse como necesaria unha maquinaria de maior envergadura e potencia debido á solidez e consistencia da rocha.
Unha vez incorporada esta nova máquina, a empresa encargada destes labores espera telos rematados nun prazo curto de tempo, garantindo a seguridade do traballo feito.