Instan a Milanuncios a controlar "de forma efectiva" os seus anuncios tras o que pedía camareira con "buen pecho"
Por Redacción
Creada e actualizada
Creada e actualizada
A denuncia do Concello de Sanxenxo polo contido sexista dun anuncio por palabras publicado na web Milanuncios.com que pedía camareira "guapa, simpática, trabajadora, don de gentes, buen pecho y mínima experiencia" desatou un bulebule de críticas. A coñecida web xa o retirou e a Secretaría Xeral da Igualdade da Xunta de Galicia remitiulles unha comunicación na que os insta a controlar "de forma efectiva" a difusión de contidos na súa páxina web que atenten contra a imaxe da muller.
A secretaria xeral de Igualdade, Susana López Abella, remitiu a carta tras recibir unha denuncia de parte do Concello de Sanxenxo e valorar que o anuncio en cuestión "difunde unha concepción denigrante da muller, ao utilizala como mero obxecto de reclamo dunha forma desvinculada do obxecto do traballo que se pretende exercer".
Na misiva lembra que a recepción de queixas sobre anuncios de contido sexista nesta páxina web é un feito reiterado nesta Secretaría e o pasado mes de febreiro xa os instaron por carta a incrementar o control e precaución sobre os anuncios de contido sexista na súa páxina web. Tras esa comunicación, a web respondeulles dicíndolles que xa realizaban un sistema de "marcas" para controlar, pero desde a Secretaría consideran que "resulta obvio que nos últimos casos denunciados reveláronse obxectivamente ineficaces, para os obxectivos perseguidos na situación que nos ocupa".
Agora, "dado o carácter reincidente" da emisión de ofertas de traballo sexistas, a Xunta insiste en instarlles a que fagan un control efectivo, sen prexuízo do traslado das actuacións á autoridade laboral competente.
Desde a Xunta indican que queda clara a responsabilidade directa dos anunciantes sobre o contido dos anuncios que realizan, pero tamén existe unha responsabilidade da persoa que presta o servizo de almacenador de datos, de tal forma que a Secretaría Xeral de Igualdade non comparte a aseveración que realiza Milanuncios.com de que a súa páxina é simplemente un "taboleiro de anuncios" alleo a toda responsabilidade. Para soster esta afirmación, na carta enumera toda a lexislación relacionada.
Despois de enviar a carta, dende a Secretaria Xeral da Igualdade indicaron que o portal de anuncios respondeu favorablemente e os responsables do portal solicitan ao goberno galego que calquera denuncia que inclúa a dito portal sexa remitida para a súa revisión inmediata. Segundo lle fixeron saber a través dun correo electrónico, "son os máis interesados en non ter anuncios que infrinxan algún tipo de norma ou lei".
Dende a Xunta de Galicia indican que esperan que así sexa "e non se consinta nin se volva a repetir" a publicación deste tipo de anuncios "machistas, denigrantes e totalmente intolerables".