Fiscalía solicita a Poio dous expedientes urbanísticos
Por Redacción
O goberno local de Poio remitiu a Fiscalía, previa petición do Ministerio Fiscal, información sobre polo menos dous expedientes urbanísticos que afectan ao Concello.
O primeiro deles, explica o alcalde Luciano Sobral, correspóndese coa colocación dunha carpa anexa ao restaurante Xantares Galegos, en Lourido. "Montouna sen licencia, houbo denuncias e un expediente de restitución da legalidade urbanística, o expediente chegou ata o Valedor do Pobo, o Concello requeriulle en varias ocasións que retirase a carpa e ao final retirouna", explicou o rexedor.
Isto sucedeu en "setembro ou outubro do ano pasado", sinalou Sobral, ao ser unha estrutura ilegalizable por estar afectada por Costas ao atopase a menos de 100 metros da ría. "A Fiscalía pide agora o expediente e tampouco sabemos moi ben por que", completou o alcalde sobre este asunto.
Tras coñecer a petición do Ministerio Fiscal, o Partido Popular preguntou na comisión de Urbanismo se tiñan constacia doutros expedientes "baixo a lupa do Ministerio Fiscal", explicando o concelleiro socialista Gregorio Agís, segundo o PP, que se requiriu tamén o expediente dunha vivenda na Armada.
A edil popular Rocío Cochón sinalou que "o inmoble afectado por esta investigación é unha vivenda construida en solo rústico", e explicou ademais que se trata de "unha das case 300 denuncias presentadas ante a APLU" no que cualificou de "caos urbanístico".