Novo pavimento para dúas pistas en Gondar e Bordóns
Por Redacción
A Concellería de Urbanismo do Concello de Sanxenxo levará a cabo o acondicionamento de dous viais municipais "que precisan dunha intervención urxente dado o mal estado en que se atopan".
Así o confirmou o edil delegado desta área, que explicou que as pistas para mellorar atópanse situadas nas parroquias de Vilalonga e Bordóns.
"Trátase de actuacións moi demandadas en estradas xa existentes que por distintas circunstancias, contan actualmente cun firmen deteriorado que dificulta o seu tránsito con seguridade", explicou Daniel Fernández .
O Concello de Sanxenxo pavimentará un vial en Gondar (Vilalonga) de 390 metros de lonxitude que vai desde a PO 504 ata a pequena capela, e outro camiño de 254 metros de lonxitude en Carballal, Bordóns.
A actuación, consistente na dotación de asfaltado en quente en ambos os viarios, dotándoos tamén das taxeas correspondentes, será sufragado pola Consellería do Medio Rural, a través do Programa Marco de mellora de camiños municipais de acceso a explotacións agrarias en 2016, cofinanciado co Fondo Europeo Agrícola de Desenvolvemento Rural, Feader.