O ámbito de Santa María reformarase con cargo á ARI do centro histórico
Por Alejandro Espiño
Dúas rúas da contorna de Santa María serán rehabilitadas de forma integral grazas ao ARI do centro histórico, segundo explicou este luns o portavoz do goberno municipal, Raimundo González. Trátase de Tristán de Montenegro e Pratería Vella, cuxas obras se licitarán en próximas semanas tras a aprobación da Xunta de Goberno.
Ambas as rúas son perpendiculares a Isabel II.
En Tristán de Montenegro investiranse 88.643,82 euros, mentres que en Pratería Vella o orzamento de licitación é de 92.623,31 euros.
Na rehabilitación integral destas dúas rúas actuarase en superficie e tamén baixo terra coa renovación de todos os servizos.
O ARI tamén permitirá dotar ao xacemento arqueolóxico de Valentín García Escudeiro dun peche perimetral definitivo. Nel investiranse 47.000 euros e permitirá, segundo Raimundo González, poñer en valor os restos achados na zona e mellorarase a iluminación.
Ademais, en Estribela as actuacións do seu respectivo ARI permitirán obras de reforma na Rúa do Mercado por 24.800 euros e concluír os traballos en Marqués de Valterra, onde se investirán 31.250 euros.
ADXUDICACIÓN DE SEGUROS
A Xunta de Goberno adxudicou, pola súa banda, o contrato para o seguro de responsabilidade civil do Concello de Pontevedra, que xestionará a compañía Zurich por 57.364 euros ao ofertar unha redución do 40% no prezo de licitación; e do seguro de vehículos, que gañou a empresa MGS Seguros ao presentar unha oferta de 49.497 euros e que cubrirá tamén danos por incendio, roubo ou indemnizacións por perda do carné de conducir.
Relacionadas:
-
Valentín García Escudero estrea iluminación monumental
Por Redacción |
-
Nesta semana avaliaranse as solicitudes de axuda para actuacións no ARI do casco histórico e Estribela
Por Redacción |
-
Valoran en case 214.000 euros a reforma das rúas Tristán de Montenegro e Pratería Vella
Por Redacción |
-
Máis de 60 vivendas históricas serán rehabilitadas con axudas públicas
Por Redacción |
-
Inicia o expediente de catalogación do edificio do Alfolí da rúa Galera
Por Redacción |