Loito na Lama polo falecemento do primeiro tenente de alcalde, Juan Carlos Piñeiro Teodosio
Por Redacción
Creada e actualizada
Creada e actualizada
A corporación municipal está de loito tras o falecemento do seu primeiro tenente de alcalde, Juan Carlos Piñeiro Teodosio.
O edil, un dos seis concelleiros do Partido Popular, faleceu á primeira hora da mañá deste mércores tras loitar durante os últimos meses contra unha "dura enfermidade", segundo confirmou o goberno local.
Juan Carlos Piñeiro volvera á corporación municipal tras as últimas eleccións, nas que Jorge Canda revalidou a súa maioría absoluta.
Na anterior lexislatura renunciara á súa acta de concelleiro, en decembro de 2013, despois de emigrar a México por motivos laborais.
A Corporación Municipal do Concello da Lama, reunida en sesión extraordinaria urxente, decidiu por unanimidade dos concelleiros presentes declarar dous días de loito oficial polo falecemento do primeiro tenente de alcalde.
O Pleno acordou tamén manter a media hasta as bandeiras nos edificios municipais e impoñerlle o seu nome ao novo parque infantil que proximamente se instalará na parroquia de Seixido, reivindicación que levara en varias ocasións á comisión de goberno o propio Juan Carlos Piñeiro Teodosio.
Juan Carlos Piñeiro Teodosio nacera en Fentosa (Seixido-A Lama) hai 46 anos, estaba casado e tiña unha filla de 19 anos. Iniciouse en política da man do alcalde da Lama, Jorge Canda Martínez, quen se mostraba moi abatido polo falecemento do seu compañeiro con quen empezara a súa actividade pública hai xa 28 anos e compartido diversas etapas na Corporación Municipal.