Fomento investirá 7 millóns de euros na mellora de estradas no ámbito de Pontevedra
Por Redacción
O Ministerio de Fomento investirá 7.112.719,24 euros en diferentes actuacións de conservación e explotación en estradas situadas na contorna da cidade de Pontevedra, segundo publica este martes o Boletín Oficial do Estado (BOE).
As empresas interesadas en realizar estes traballos poderán presentar as súas ofertas para este contrato de licitación ata o próximo 1 de xuño.
En concreto, Fomento prevé actuacións de mantemento na PO-10 entre o nó do Pino e a ligazón de Beiramar, a PO-11 e o acceso ao porto de Marín, a PO-12 e a avenida de Marín ou a avenida de Compostela.
Ademais, mellorarase o firme na estrada N-541 Pontevedra-Ourense ao seu paso pola provincia, na N-550 entre Caldas de Reis e Pontevedra, na N-550 entre Pontevedra e Redondela e na N-554 entre Vilaboa e Rande.
Este contrato ten un período de execución de catro anos.