Emotivo acto en Bueu en recordo a Johán Carballeira, no 79 aniversario do seu fusilamento
Por Redacción
No día no que se cumprían 79 anos do fusilamento de Johán Carballeira na Caeira a man dos franquistas, medio cento de persoas rendéronlle homenaxe en Bueu, vila da que foi alcalde antes do golpe de estado fascista. Xunto a el foron tamén asasinados os irmáns Chapela e Manuel Graña Pouseu, aos que tamén se recordou neste acto cívico.
Este acto, organizado pola Asociación de Amigos de Johán Carballeira de Bueu, comezou coa lembranza de todos os que sufriron en carne propia o prezo de loitar pola liberdade, cunhas palabras de Manuel Mosteiro e Xosé Novas, membros da asociación, e de Luís Bará, concelleiro en Pontevedra, quen tamén dirixe o blog sobre memoria histórica "Non des a esquecemento".
Os tres destacaron a importancia da celebración destes actos, que serven como "reparación e lembranza", e que "poñen a cada un no seu lugar".
Bará quixo salientar tamén o acto que celebrou o Concello de Bueu o pasado ano en homenaxe dos membros da corporación municipal de Bueu no 1936, persoas ás que tamén se lembrou neste acto simbólico.
Manuel Mosteiro, presidente da Asociación de Amigos Johán Carballeira, insistiu en que o que se viviu en Galicia no ano 1936 "non foi unha Guerra Civil, como erradamente se lle deu en chamar, senón unha barbarie e un xenocidio contra os que estaban no lado correcto, pero equivocado".
A ofrenda floral tivo lugar xunto á escultura na honra de Johán Carballeira, na praia da Banda do Río, e foi a cargo de Manuel Mosteiro e de Manuel López, fillo de José de la Torre, un dos concelleiros da corporación buenense do 36 e que foi sometido ás vexacións do réxime.
A continuación desenvolveuse no Centro Social a presentación do libro de Montse Fajardo Un cesto de mazás, no que se contan dezaseis historias dos que se foron e dos que quedaron, dos que tiveron que sobrevivir e verter bágoas ata que alguén lles deu a oportunidade de contar o que pasou naqueles anos.
Precisamente a xornalista pontevedresa destacou a importante labor de recuperación da memoria oral e de que estas historias non se esquezan.