O 'aniñadoiro' de arte volve este sábado ao Liceo Mutante
Por Redacción
O Liceo Mutante acollerá este sábado 16 de abril, a partir das doce da mediodía, unha nova edición de Aniñadoiro, o seu mercado de novos creadores.
Coa entrada de balde, todos os interesados poderán achegarse ás súas instalacións na rúa Rosalía de Castro 100, para gozar da coidada selección de participantes, do bo ambiente e dun vermú ou un pincho vegano.
O Aniñadoiro, que naceu seguindo o empeño do Liceo Mutante de apoiar a creación e o arte en todas as súas manifestacións, contará con proxectos que van desde propostas para os máis pequenos coma os xoguetes artesanais de Artludic, ata o deseño téxtil sostible de LeChanelas, pasando polo magazine de divulgación cultural que o colectivo Croa presentará durante a xornada do sábado.
O broche final do evento será unha tómbola na que se sortearán produtos do merchandising do Liceo Mutante, xunto con agasallos doados polos artistas.
Tras a grande acollida do ano pasado, este ano o Liceo Mutante volve a carga coa segunda edición da que comeza a ser unha das datas sinaladas no calendario de primavera da asociación, que arranca a súa tempada forte de actividades que culminará no que este ano é o seu quinto aniversario.
Son xa cinco anos traballando coma dinamizadores da cultura underground, sendo escenario, xunto con outras asociacións irmás, de propostas do máis diversas que de non existir non terían cabida no escenario habitual galego.