Luis Rei rexeita a tarxeta de aparcadoiro gratuíto que o Concello entrega aos concelleiros da oposición
Por Redacción
O portavoz de Marea Pontevedra, Luís Rei, acudiu este xoves ao rexistro do Concello para devolver de xeito oficial a tarxeta de aparcadoiro gratuíto que lle entregaran pouco tempo antes dende o goberno local. No transcurso da xunta de portavoces, o alcalde, Miguel Anxo Fernández Lores, deu aos membros da oposición unha tarxeta con iguais características ás que xa ten o goberno municipal, pero Luis Rei optou por rexeitala.
"Non podemos aceptar privilexios deste tipo namentres os traballadores pagan do seu peto e se privatizan as rúas diante da ausencia total de aparcadoiros gratuítos e transporte público", indicou Luís Rei, que quixo deixar claro que desde Marea nunca solicitron ter esa tarxeta.
Segundo indican desde Marea, o "privilexio" das tarxetas de aparcadoiro é un tema co que o goberno local leva cinco meses, pero ata agora o alcalde "intentou xogar ao gato e ao rato coa oposición". Todo, mentres, noutros aspectos "non facilita o traballo da oposición, pois insiste en que Pontevedra é o único dos grandes concellos galegos no que os voceiros municipais non teñen dedicación exclusiva nin despachos para recibir á veciñanza ou apoio técnico de funcionarios.
Para Luís Rei, aceptar este privilexio seria rirse dos traballadores que todos os días entran na cidade tendo que pagar prezos elevadísimos en parkings privados. Segundo os datos que aportan dende Marea, o valor da tarxeta supón 1.503 euros ao ano, o prezo do bono anual no aparcadoiro de Montero Rios.
O 'modelo de cidade' de Pontevedra susténtanse na peonalización. Dende Marea indican que comparten esa idea, pero critican "a non existencia de aparcadoiros periféricos gratuítos e a ausencia de transporte público" porque "vólvese nun problema económico nunha cidade coas rúas privatizadas".