Saen a poxa unha egua e o seu poldro, ambos recollidos en Salcedo
Por Redacción
O Concello de Pontevedra organizará o próximo mércores 20 de abril, a partir das doce e media da mañá, unha poxa pública de dous cabalos. Son unha egua e o seu poldro, recollidos no seu día en Salcedo.
A poxa terá lugar na sala de reunións do edificio Churruchaos.
O pequeno ten aproximadamente un mes e a egua uns nove anos. Están en aparente bo estado sanitario e non teñen identificación.
A concellería responsable de Sanidade Animal informa que é un lote conxunto e sae por 70 euros.
Os interesados en participar na poxa pública deben depositar o prezo de saída en concepto de fianza antes das 11:30 da mañá na tesourería municipal.
A persoa que se quede cos animais debe saber que antes de recollelos ten que identificalos correctamente co preceptivo transpondedor, e o custe corre por conta do adxudicatario.
En caso de quedar a poxa deserta, os animais serán entregados á Xunta de Galicia.