Unha nena de 5 anos resulta ferida nun atropelo nun paso de peóns en Alcalde Hevia
Por Redacción
Unha nena de cinco anos resultou ferida e tivo que ser trasladada ao Hospital Provincial de Pontevedra tras sufrir un atropelo á altura dun paso de peóns á primeira hora da mañá deste mércores na rúa Alcalde Hevia, no barrio de Campolongo.
Segundo informou a Policía Local de Pontevedra, o atropelo produciuse sobre as 9.00 horas nunha zona de Alcalde Hevia próxima xa á avenida Fernández Ladreda. Tras o atropelo, desprazáronse ao lugar axentes municipais e unha ambulancia do 061, que asistiu á nena e trasladouna ao centro hospitalario.
A nena presentaba, segundo o prognóstico inicial realizado, fracturas no brazo e unha costela.
No momento en que se produciu o atropelo, a Policía Local constatou que había un coche mal estacionado nun espazo cebreado diante do paso de peóns, de tal forma que reducía a visibilidade do mesmo. O vehículo foi denunciado polos axentes municipais e retirado polo guindastre.