A Fiscalía pide catro anos de cárcere para un home por vender drogas nun bar de Marín
Por Redacción
A Sección Segunda da Audiencia Provincial de Pontevedra sinalou para o vindeiro martes 19 de abril un xuízo por tráfico de drogas.
A Fiscalía de Pontevedra pide unha condena de catro de prisión e unha multa de 10.000 euros para un home acusado de vender droga nun bar que rexentaba en Marín.
No escrito de acusación do Ministerio Público, facilitado polo Tribunal Superior de Xustiza de Galicia, detállase que o acusado vendeu distintas sustancias estupefacientes que gardaba no bar que rexentaba.
No rexistro practicado pola Policía Nacional no local fóronlle localizadas sustancias e diversos obxectos que estaban destinados á venda a terceiros.
En concreto, foron sete "landras" e media de resina de cannabis con peso de 76'956 gramos, tres anacos de resina de cannabis con peso de 3'861 gramos, 2 bolsitas de cannabis cun peso total de 1'548 gramos, 52 bolsitas de cocaína cun peso de 20'51 gramos e unha riqueza do 37'67% e 2 bolsitas de cocaína con peso de 7'694 gramos e unha riqueza do 18'6%.