O vello obradoiro de emprego convértese nun local de ensaio
Por Redacción
Os veciños de Ponte Caldelas celebraron a inauguración do novo local de ensaio que teñen asignado a Banda de Gaita e Baile Os Coribantes de Buchabade no antigo e recén remodelado obradoiro de emprego que se atopaba en desuso.
O equipo de goberno do Concello de Ponte Caldelas decidiu arranxar estas instalacións ubicadas no anexo do pavillón municipal de deportes para que teñan un mellor aproveitamento cidadán adicándoo a locais de ensaio para os grupos musicais do municipio, transformando os habitáculos de distintos tamaños en aulas de usos múltiples e almacén que tamén será utilizado por Servizos Sociais e persoal do Concello.
O presidente de Os Coribantes, Ángel Lale "Lito", agradeceu ao Concello a receptividade ante as necesidades que presentaba esta agrupación de música tradicional e baile que conta con máis de medio cento de nenos na súa escola.
Os Coribantes adolecían dun lugar de ensaio onde poder preparar as súas coreografías e tiñan que simultanear as súas clases no Centro Cultural, o CEIP Cordo Boullosa e o Instituto dun xeito ambulante, o que poñía a esta agrupación nunha situación de precariedade absoluta.