O BNG de Marín propón un plan para combater o paro feminino
Por Redacción
O grupo municipal do BNG en Marín rexistrou unha moción para o seu debate no pleno na que se insta ao goberno local a poñer a disposición das mulleres desempregadas ou en situación laboral precaria todos os medios municipais posibles para orientalas no proceso de busca de emprego.
En concreto, o BNG insta ao goberno local á convocatoria urxente da comisión de seguimento do Plan de Emprego Municipal e á elaboración dun plan orientado a proporcionar ás mulleres información permanente sobre a situación do mercado laboral na comarca e das ofertas existentes, proporcionarlles a aquelas que queiran iniciar una actividade empresarial, orientación, información e asesoramento para o desenvolvemento e a consolidación da súa empresa, ou achegar as actividades formativas ás mulleres das parroquias ou facilitarlles o desprazamento ao centro de formación.
Todas estas medidas deberían ser analizadas e aprobadas pola comisión do Plan de Emprego Municipal e polo Consello Municipal da Muller, mais o PP negou por completo esta posibilidade.
Para os nacionalistas do Bloque "este é un exemplo máis de que as políticas do goberno local son mera propaganda" e sinalan que a día de hoxe o Centro de Información ás Mulleres (CIM) leva meses (desde setembro pasado) sen asesoramento xurídico, o mesmo que hai desde que a abogada que realizaba estas función se deu de baixa para ir a outro posto de traballo.
"É dicir, hai meses que non se ofrece o servizo básico de asesoramento legal ás mulleres ao que esta obrigado o concello", afirma a concelleira do BNG, Pilar Blanco.