Alertan da presenza en Sanxenxo dos "timadores do asfalto"
Por Redacción
Dous homes duns 30 anos e de fala inglesa. Son, segundo a descrición dos veciños das zonas de Fontoira e Gondar, os protagonistas dunha presunta estafa. Ofrecen asfalto a baixo prezo e a Policía Local advirte de que poderían estafadores, polo que pide aos cidadáns que presten especial atención a este tema.
Os dous mozos din dispoñer dun excedente de asfalto sobrante dunha obra executada por eles, razón pola que venden este material a un prezo moi por baixo do de mercado, esixindo un pago por adiantado.
A Concellería de Seguridade, que xa puxo en coñecemento da Garda Civil de Sanxenxo os feitos comunicados por varios veciños, sospeita que podería tratarse dunha variante do "timo do asfalto" que hai xa uns meses levou á Garda Civil a deter a varias persoas na zona de Mos e O Porriño.
Na comarca de Vigo o obxectivo dos estafadores eran empresas, ás que ofrecían servizos de asfaltado a prezos económicos e, unha vez pago, non cumprían co pactado e esixían unha suma moito maior para terminar o traballo.
Os homes desprázanse nun Seat Ibiza de cor branca e a Policía Local pide a particulares e empresas que denuncien ante calquera sospeita de timo.
Hai pouco máis dun ano, a Garda Civil detivo varias persoas acusadas de cometer 18 timos deste tipo en nove provincias españolas