Comezan os traballos para recuperar a Ponte do Campo de Marín
Por Redacción
O Concello de Marín iniciou os traballos de restauración e mellora da Ponte do Campo coa pretensión de reformar a parte que afecta á corrente de auga para conseguir rehabilitar a estrutura da construción e recuperar as condicións naturais para que a canle non afecte á súa estabilidade, segundo informa o goberno local.
O proxecto conta cos informes favorables de Patrimonio e de Augas de Galicia. A primeira fase desta obra centrarase na reparación da estrutura e na reposición dos servizos afectados, ademais da reconstrución das condicións da contorna que permitan un caudal uniforme baixo a ponte.
A Ponte do Campo atópase sobre o río Loira no viario que une os núcleos rurais do Campo e O Coto, nunha contorna natural no que se foi humanizando a paisaxe, formando camiños e levantando construcións auxiliares como muíños ou lavadoiros.
O orzamento para este traballo nunha ponte de tradición construtiva popular ascende a 55.642 euros.