Rescatan máis de 150 anfibios atrapados nunha canle de rega en Ponte Caldelas
Por Redacción
Voluntarios da ONG ecoloxista Adega rescataron máis de 150 anfibios que se atopaban atrapados nunha canle de rega en Ponte Caldelas. O obxectivo era salvalos e axudarlles a completar o seu ciclo vital.
Foi, segundo sinalan desde a organización, un traballo máis minucioso que noutras ocasións. Boa parte dos anfibios rescatados eran tritóns que estaban agochados entre a pouca vexetación que queda na canle.
Ademais, atoparon tres exemplares mortos e un deles a piques de facelo.
A eles hai que sumar os 112 anfibios que rescatou o persoal da Dirección Xeral de Conservación da Natureza nos últimos días. Todos cren que o problema continuará nos vindeiros días, xa que se prevé que co aumento das temperaturas se incremente o movemento destes animais.
Nesta época ducias de sapos baixan polo monte dirección ao río, pero no camiño atópanse con esta barreira. Nas partes nas que a canle de rega aínda ten auga poderán desovar pero lamentablemente xa non poderán saír. As paredes laterais convértense nunha trampa mortal para eles e para outros moitos anfibios que se achegan ao lugar para desovar ou alimentarse.
Adega entende que despois de tres campañas dedicadas ao rescate destes anfibios deberíase buscar unha solución que evite estas situacións.
De feito, a canle estase a limpar, eliminando a pouca vexetación que ten e impermeabilizando o vaso, o que complicará aínda máis a supervivencia dos animais atrapados nela.