Ana Pastor visita o centro de conservación de estradas de Fomento en Vilaboa
Por Redacción
Un total de 112 quilómetros de estradas consérvanse desde o centro que o Ministerio de Fomento ten en Vilaboa. Trátase dunhas instalacións, situadas no quilómetro 1,300 da estrada N-554 que foron visitadas este luns pola ministra Ana Pastor.
Desde aquí realízanse as tarefas de vixilancia, atención a accidentes e incidentes, sinalización ocasional e mantemento da vialidade, vialidade invernal, mantemento de instalacións, establecemento de inventarios, actuacións de apoio á explotación, así como todas as tarefas de conservación ordinaria, tanto planificadas como programadas.
Este sector de conservación de estradas inclúe fundamentalmente a estrada N-541 -no seu ámbito dentro da provincia de Pontevedra-, a estrada N-550 entre Caldas de Reis e Redondela, a estrada N-554, e a rede arterial de estradas do Estado na contorna da cidade de Pontevedra.
En total, a Rede de Estradas do Estado na provincia de Pontevedra consta dun total de 530 quilómetros, dos cales 127 corresponden a autoestradas de peaxe, 80 a autovías, 6 a estradas de dobre calzada e 317 a estradas convencionais.
Segundo destacou Ana Pastor, o investimento en conservación na provincia de Pontevedra no últimos catro anos ascendeu a un total de 74,24 millóns de euros.