Preto de 500 pacientes son atendidos por vertixe nos hospitais públicos de Pontevedra
Por Redacción
A vertixe é unha sensación subxectiva de movemento que pode ter dúas orixes, o central, producido no cerebro, ou o periférico causado por unha lesión no oído interno. Calcúlase que entorno ao dez por cento do total da poboación pode sufrir esta patoloxía nalgún momento da súa vida. Esta porcentaxe increméntase no caso das mulleres e nas persoas de máis de 50 anos.
Cada ano, o servizo de Otorrinolaringoloxía do Complexo Hospitalario Universitario de Pontevedra atende cada ano preto de 500 novos pacientes a causa da vertixe na unidade especializada de otoneuroloxía. Esta unidade componse por tres facultativos especialistas e un equipo de enfermería, que se encargan do diagnóstico e tratamento dos diferentes tipos de vertixes.
A patoloxía máis frecuente tratada na unidade é a vertixe posicional paroxístico, que afecta case a un 50% dos pacientes. Tamén se atenden os problemas causados pola enfermidade de Méniere, unha patoloxía crónica do oído interno con síntomas moi incapacitantes, que mellora de forma ostensible cos tratamentos actuais.
A unidade de vertixe dispón de tecnoloxía específica para a realización de probas que axuda a precisar os diagnósticos. Proximamente incorporaranse novos equipos que poderán determinar se a causa da vertixe é unha lesión cerebral ou se é de orixe periférica. Deste xeito, diminúen ademais os ingresos e as peticións de resonancias magnéticas.