Máis de 100 escolares, afectados por unha intoxicación alimentaria en Vilanova de Arousa
Por Redacción
Creada e actualizada
Creada e actualizada
Ao redor de 106 menores e algún dos monitores que lles acompañan na participación no campionato de baloncesto Vilagarcía Basket Cup víronse afectados por unha intoxicación alimentaria no Concello de Vilanova de Arousa sufrida durante as últimas horas deste sábado 26, segundo informa o servizo de Emerxencias do 112.
Os escolares afectados teñen entre 12 e 17 anos. Todos eles atópanse hospedados nun hotel da rúa Caleiro en Vilanova. Ás 9.00 horas deste sábado, un particular chamaba ao 112 Galicia para informar de que a maioría dos menores deste club e algún dos adultos da expedición sentían indispostos.
O persoal do 112 alertou a Urxencias Médicas e ata o lugar desprazáronse dous médicos que ata primeiras horas da tarde atopábanse atendendo ás persoas afectadas. Segundo os primeiros indicios, todo apunta a que se trata dunha gastroenterite. Dous dos mozos, de 15 e 16 anos, foron trasladados durante a tarde deste sábado ao Hospital do Salnés. Do resto, 80 presentan síntomas leves e 26 precisaron tratamento médico.
O 112 Galicia informou tamén o Grupo de intervención psicolóxica en catástrofes e emerxencias (GIPCE), aínda que ningún deles precisou asistencia psicolóxica. O 112 Galicia tamén trasladou a información á Policía Autonómica, a Protección Civil e á Policía Local.
Está previsto, que agás os dous nenos ingresados, os demáis regresen nas vindeiras horas a León e a Ponferrada, as súas localidades de orixe.