Sanxenxo estuda varias opcións para peonalizar Augusto González Besada
Por Redacción
A rúa Augusto González Besada será peonalizada antes do verán. Pero para iso, o Concello de Sanxenxo estuda diversas opcións.
Desde a Concellería de Seguridade traballan para determinar cal é a fórmula máis adecuada para facilitar o acceso aos garaxes dos edificios existentes nesta vía, que une a Praza dos Barcos coa Avenida de Madrid.
O obxectivo desta actuación é conseguir unhas mellores condicións de seguridade viaria para os peóns que transitan por esta zona, á vez que se compatibiliza con isto a intensa actividade comercial nesta contorna.
Desde o goberno local pretenden así dar resposta a unha reiterada demanda veciñal, reactivada desde o pasado mes de xuño co cambio de goberno, xa que son moitos os cidadáns que consideran que esta contorna debería ser recuperado como zona de lecer.
Tamén o propio Concello entende que nas épocas de maior concentración turística o tráfico rodado supón un perigo para os moitos cidadáns que gozan dos servizos que ofrece esta rúa, onde se concentra un importante número de terrazas e establecementos de hostalería.
A iso hai que sumar que a proximidade da Praza dos Barcos, onde o Goberno local xa prohibiu o seu uso para carga e descarga, convida o xogo dos máis pequenos, que en ocasións vese en risco pola presenza de coches.
A peonalización de Augusto González Besada non supón, sinalan desde o goberno municipal, alteración algunha para o tráfico no centro urbano de Sanxenxo ao tratarse dunha vía basicamente de acceso a residentes, para quen seguirá estando permitida a súa utilización