Destinan 2,5 millóns para comprar material cirúrxico para os hospitais de Coruña e O Salnés
Por Redacción
A Consellería de Sanidade publicou no Diario Oficial de Galicia o anuncio do expediente de gasto destinado á dotación de equipamento do novo bloque cirúrxico do Hospital do Salnés.
Tamén se inclúe neste expediente equipamento para o Hospital Universitario da Coruña, todo iso por valor de 2.493.205 euros.
Con esta licitación procederase á compra dos equipos que deben ser instalados para poñer en funcionamento os bloques cirúrxicos na fase final das obras de ampliación do hospital.
Segundo as previsións que manexa a Consellería, no que respecta ao Hospital do Salnés a primeira fase das obras concluirá a finais do primeiro semestre deste ano, o que permitirá dar un mellor servizo na área de urxencias e obstetricia.
No expediente, conxunto para Coruña e O Salnés, contémplanse 18 lámpadas cirúrxicas de alta gama con tecnoloxía LED, 18 mesas cirúrxicas de altas prestacións motorizadas, tres torres de endoscopia cirúrxica para cirurxía xeral e dixestiva e outra para o servizo de otorrinolaringoloxía.
Tamén se contempla a dotación completa de tres quirófanos de cirurxía endoscópica con integración da imaxe e os sistemas de control.